Георгиева: Без поголема помош од развиените економии, земјите во развој дополнително ќе заостанат

Директорката на Меѓународниот монетарен фонд, Кристалина Георгиева, ги повика развиените економии да обезбедат повеќе ресурси за земјите со ниски примања, предупредувајќи на „големите дивергенции“ во глобалниот раст, што може да ја загрозат стабилноста и да предизвикаат социјални немири во следните години.

Управниот директор на Меѓународниот монетарен фонд рече дури 50 проценти од земјите во развој се изложени на ризик од натамошно заостанување, што предизвикува загриженост за нивната стабилност и потенцијални социјални немири.

„За да се избегнат поголеми проблеми, богатите земји и меѓународните институции треба да обезбедат повеќе средства. Сепак, силно задолжените сиромашни земји, исто така, мора да бараат преструктуирање на долгот, порано отколку подоцна, и да обезбедат услови за поголем раст”, изјави Георгиева.

Според неа, ММФ проценува дека земјите во развој, кои со децении се приближуваат до просечното ниво на глобален доход, овој пат ќе се најдат во многу потешка ситуација.

„Минатата година главниот фокус беше ставен на локдаунот, а годинава се соочуваме со ризик од големата дивергенција”, оцени Георгиева за време на видео-конференциска врска со повеќе светски медиуми.

Георгиева додаде дека развиените економии трошат во просек околу 24 проценти од бруто домашниот производ (БДП) на мерките за поддршка за време на пандемијата, во споредба со 6,0 проценти од БДП на земјите во развој и 2,0 проценти во земјите со ниски приходи.

Шефот на Меѓународниот монетарен фонд предупреди дека САД се соочуваат со можен „опасен бран“ на банкрот и невработеност доколку не продолжат да даваат фискална поддршка се додека не заврши здравствената криза на коронавирусите.

Кристалина Георгиева рече дека САД, кои се најголемата економија во светот, имаат можност да преземат понатамошни активности и тоа ќе обезбеди ширење позитивни ефекти во светската економија.

На прашањето дали го поддржува антикризниот план на претседателот Џо Бајден вреден 1,9 трилиони долари, Георгиева рече дека ММФ го поддржува фокусот на планот кон вакцинирање, здравствена заштита, поддршка на невработените и помош на државните и локалните власти.

И покрај економското закрепнување, таа верува дека ризиците остануваат, особено ако поддршката не се обезбеди доволно долго.

„Сè уште постои опасност доколку нема поддршка, додека трајно не излеземе од здравствената криза, може да има опасен бран на банкрот и невработеност“, изјави Георгиева.

Директорката на ММФ истакна дека активностите за вакцинација се нееднакви и дека сиромашните земји се соочуваат со „огромни потешкотии“.

Само една земја во Африка, Мароко, почна да го вакцинира населението, истакнувајќи и изразувајќи сериозна загриженост за зголемената смртност во многу африкански земји.

Шефицата на ММФ кажа дека забрзувањето на вакцинацијата може да ја зајакне глобалната економија за 9.000 милијарди долари до 2025 година, а при што 60 проценти од користа ќе ја имаат земјите во развој.

You must be logged in to post a comment Login

ОСТАВЕТЕ КОМЕНТАР