Во Белорусија протести,а Лукашенко се скија со Путин

Објавено од Насловна на февруари 22, 2021

Белорускиот лидер Александар Лукашенко, кој веќе шест месеци се соочува со протести против неговото владеење, се состана денес со рускиот претседател Владимир Путин и ги истакна блиските односи меѓу двете земји.

„Не поминува ден без колегите да разговараат и да решат одредени проблеми“, рече Путин на состанокот во Сочи.

Двајцата претседатели потоа отидоа на скијање.

Врз основа на емитуваното на телевизија, тема на разговор не биле протестите во Белорусија. Аналитичарите очекувале Путин да го покрене прашањето за судењето на истакнатиот опозициски лидер Виктор Бабариков, кој бил шеф на Гаспромбанк во Белорусија.

Лукашенко и Путин последен пат се состанале во септември минатата година, еден месец по претседателските избори во Белорусија, за кои многумина сметаат дека се наместени, што ги предизвика тековните масовни протести.

Путин тогаш му даде на Лукашенко милијарди долари заеми, а лидерот на Кремљ сега смета дека соработката меѓу двете економии е поважна од „директната финансиска помош“ на Москва.

Русија изврши притисок врз Лукашенко, кој ЕУ повеќе не го признава како претседател, да го измени уставот на земјата.